તમે આવો બે ઘડી…

આજે વહેલી સવારનો ચાંદ મને ખુબ ગમ્યો.ચમકી ગયા ને ? સવારનો ચાંદ ? હા,શરદપૂનમ પછીની વહેલી સવારનો ચાંદ. રાત આખી યે ખુલ્લાં આકાશમાં એકલો એકલો ફરીને, સમગ્ર વિશ્વને ચાંદનીમાં સ્નાન કરાવતો ચાંદ, પરોઢિયે મને એક તપસ્વી જેવો લાગ્યો,વધુ તેજસ્વી લાગ્યો.

ક્ષણભર એક કલ્પના જાગી કે સાવ ખાલીખમ આકાશમાં એકલો રહીને પણ આ તેજથી ભરપૂર છે; અને ભીડથી ભરેલી ધરતી આજે સાવ ખાલીખમ છે. કદી આ ચાંદ ઇશ્વરનું રૂપ ધરી અહીં ઉતરી ન આવે ?!!!

ને આ તરંગ આરઝુ બની બોલી ઉઠે છે કે……

અહીં ખાલી ખાલી ને બધું ખાલી લાગે.
તમે આવો બે ઘડી, તો ઘડી વહાલી લાગે.

કાયાની દિવાલે આતમને પૂરી,
તમે પડદે રહો તે ક્યાંથી ચાલે ?
અંદર ને અંદર કોઇ બોલ્યા કરે,
ઝીણો ઝીણો રે સાદ એમ ઘૂંટ્યા કરે,
સંવાદી ગીતથી ડોલાવી મનડું,
તમે ગાઓ તો ક્ષણ મતવાલી લાગે,
જીવન-અટારીએ તાલી વાગે, જાણે મેળામાં જાત મુજ મ્હાલી લાગે.
તમે આવો બે ઘડી તો ઘડી વહાલી લાગે…

પાંખો પ્રસારી જેમ પંખીઓ ઊડે,
ને  આભલુ વિશાળ તોયે નાનું પડે.
રાતો વીતે ને તોયે વાતો ના ખૂટે,
ભવભવના જન્મારા ઓછા પડે.
પાસે બેસીને, કા’ન વાતો કરીને,
તમે ફેરવો જો હાથ હરિ-યાળી લાગે…
અણગમતી પળ પછી પ્યારી લાગે, વાસંતી ડાળ જાણે ફાલી લાગે.
તમે આવો બે ઘડી, તો ઘડી વહાલી લાગે.