‘ભ’ની ભીતર

ભાઇભાભીના ભરપૂર ભાવે,
ભગિનીનું ભીતર ભીંજે,
ભક્તની ભક્તિના ભાવે,
ભગવાનનું ભીતર ભીંજે.

ભલા ભોળા ભદ્રજનોને,
ભીડમાં ભીંસાતા ભાળી,
ભૂમંડળે ભમતા ભમતા,
ભોમિયાનું ભીતર ભીંજે.

ભવરણે ભલો ભેરૂ ભેટે,
ભવસાગરનો ભાર ભાંગે.
ભવાબ્ધિમાં ભાવ ભરાતા,
ભાર્યાનું ભિતર ભીંજે.

ભોમ ભયહીન ભાસે,
ભૂલોકનું ભાવિ ભવ્ય ભાસે;
ભૂખ્યાની ભૂખ ભાંગતા,
ભવાનીનું ભીતર ભીંજે.

બાલમ બજાવે બંસી……

બાગમાં બુલબુલ બોલે,
        બેકાબુ બને બારાતી.
બટમોગરે બહાર,
        બાલમ બજાવે બંસી………

બહાવરી બહાવરી બાલા,
        બાયે બાજુબંધ બાંધે,
બેજવાબ બાંકેબિહારી,
        બાલમ બજાવે બંસી………

બેચેન બને બાબુલ,
         બેતાબ બને બાંધવ,
બંધન બાંધે બહેના,
        બાલમ બજાવે બંસી……..

બંગડી,બિંદી બેલડી,
         બંને બૃહદ્ બુલંદી,
બલિહારી બાજીગરની,
        બાલમ બજાવે બંસી………  

 

‘ફ’ ના ફૂલો

 

ફાગણમાં ફૂલોની ફોરમ ફરીવાર,
          ફળોથી ફાલતી ફસલ ફરીવાર.

ફરીથી ફલકમાં ફેલાતા ફેરફારે,
          ફિક્કી ફરસ ફાલતી ફરીવાર.

ફરતો ફરતો ફળિયામાં ફેંટાબાજ,         
           ફૂલકાને ફૂંકી ફુલાવતો  ફરીવાર.

ફક્કડ ફિરંગીની ફોગટ ફરિયાદે,
          ફીકરને ફાક્તો ફકીર ફરીવાર.

ફાંકામાં ફુવારે ફુદરડી ફરતા,
          ફેંક્યો  ફરેબીએ ફટકો ફરીવાર.

ફાગણમાં ફૂલોની ફોરમ ફરીવાર,
          ફળોથી ફાલતી ફસલ ફરીવાર.

‘પ’ની પ્રાર્થના

 પહેરી પાયલ પનઘટ પર,

        પનિહારી પલકે પાંપણ પલપલ,

પાથરી પાનેતરનો પાલવ,

        પહોરે પોકારે પ્રિતમ પ્રિતમ…

પહેરી પટકૂળ પીળું પીતામ્બર,

        પવન પગલે પૃથ્વી પથ પર,

પળમાં પહોંચે પ્રભુજી પાદર,

        પ્રકૃતિ પામે પ્રચ્છન્ન પગરવ…

પુષ્પ પ્રફુલ્લિત પાનપાન પર,

        પાંખ પ્રસારે પંખી પિંજર,

પનિહારી પામે પૈગામ પટપટ,

        પહોંચી પામે પ્રીત પરબ પર…

પહેરી પાયલ પનઘટ પર,

        પામે  પાવન પ્રસાદ પલપલ,

પાડે પડઘા પરવત પરવત

        પનિહારી પ્રાર્થે પ્રભુને પલપલ….

****************    ****************    ****************   

પદ્મનાભ: પ્રભુ પાવન,પવિત્રાણામ પરમ પિતા,
પુષ્કરાક્ષ:પ્રાણદો પ્રાણ:,પ્રતિષ્ઠામ પર્યવસ્થિતમ;
પ્રજાભવ: પ્રભુરીશ્વર: પુષ્પહાસ:પ્રજાગર:
પ્રાંશુર્મોઘ: પ્રકાશાત્મા,પૂણ્યકીર્તિ પ્રિયકૃતમ.

****************    ****************    ****************    

‘ધ’ની ધરતી

ધોમધખતા ધૂપથી ધીખે,

          ધીમી ધીમી ધરા ધીખે,

ધક્ધક્તી ધમનીઓ ધડકે,

          ધન-ધાન્યની ધગશ ધરે,

ધૂપસળી-શી ધૂમ્રરેખે,

          ધૂન ધ્યેયની ધીરે ધીરે.

ધૂમધડાકે ધેનૂ ધ્રૂજે,

          ધસમસતી ધીરજથી ધારે,

ધરણીધરના ધાગે ધાગે,

          ધનંજયી ધ્વજ ધીમે ધીમે,

ધન્ય ધન્ય ધરતીને ધાબે,

          ધન્ય ધન્ય ધાતાને ધામે.

 

 ધાતા=વિધાતા

‘દ’ના દર્શન

દુનિયાના દસ્તૂરને દફનાવી દો, દુર્ભાગ્યની દાસ્તાનને દબાવી દો,
દઝાડતા દુર્વચનોને દેશવટો દઇ; દેવાલયના દીવાઓને દિપાવી દો..

દોલતના દુ:ખ,દરદને દફનાવી દો, દામના દસ્તાવેજને દબાવી દો,
દંભના દરેક દરવેશને દંડ દઇ; દિલની દોલતને દિપાવી દો.

 દાનવી દુર્મતિને દફનાવી દો, દૈત્યોના દાવાનળને દબાવી દો,
“દુ:ખની દવા દા‘ડા“ની દુવા દઇ, દૈવના દમામને દિપાવી દો.

 દુષ્પ્રાપ્યની દોટને દફનાવી દો, દુર્બુધ્ધિની દખલને દબાવી દો,
દંશતા દરને દક્ષતાથી દાટી દઇ; દ્રષ્ટિની દીર્ઘતાને દિપાવી દો..

દગાબાજીના દળને દફનાવી દો, દુર્વ્યસનના દમનને દબાવી દો,
દુશ્મનની દિવાલોને દિશા દઇ, દોસ્તીના દર્શનથી દિપાવી દો.

દુ:સ્વપ્નના દુહાને દફનાવી દો, દાહક દિલાસાઓને દબાવી દો,
દીન દુ:ખીને દયાના દાન દઇ; દેવીના દામનને દિપાવી દો..

 

‘ત’ના તારલા

તારલાના તેજે, તારલાના તેજે,
તલસે તલાવડીને તીર તું,
તરણાઓ તોડતીને તાક્તી તું તારલે…..

તાલીઓના તાલે,તબલાના તાલે,
તડપે તનમન તન્મય તાલમાં,
તિમિરમાં તેજ તારું તસતસતું તારલે…..

તક્દીરના તાપે, તક્દીરના તાપે,
તાસીર તપીને તપાવતી,
તણખા તલાશના તગતગતા તારલે…..

તાંતણાના તારે, તાંતણાના તારે,
તંદ્રા તરછોડી, તનહાઇમાં,
તરસે તસ્વીર તારી તરવરતી તારલે…..

‘ઢ’નો ઢોલ

      

ઢોલિયો ઢાળી ઢોલીએ,
ઢોલક ઢમ ઢમ ઢબુકાવ્યાં,

ઢંઢેરાના ઢાંચે ઢબથી,
ઢંક,ઢોર,ને ઢેલ ઢળકાવ્યાં;

ઢેબરાં ઢાંકી ઢૂંકડેથી,
ઢચૂક ઢચૂક ઢીંગલા ઢસડાવ્યાં,

ઢાલથી ઢાંકપીંછોડના ઢંગે,
ઢળી ઢોળાઇ ઢોલ ઢંઢોળાવ્યાં.

ઢોલિયો ઢાળી ઢોલીએ,
ઢોલ ઢમ ઢમ ઢબુકાવ્યાં.

 

 ઢંક=કાગડો

‘ડ’- ડોલરનો ડંખ

‘ડ‘- ડોલરનો ડંખ

હાયકુ :  5-7-5

( 1 )

ડોલર ડંખે,

ડગમગ ડગલું,

ડેલીએ ડૂસ્કું.

( 2 )

ડોલર ડાળી,

ડોલતી ડોલાવતી,

ડોકે ડસતી.

તાન્કા :  5-7-5-7-7

(મૂળે જાપાનીઝ કાવ્ય-પ્રકાર, 31 અક્ષર,પાંચ લીટી. )

 ( 1 )

ડોલર ડંકે,

ડુંગરાઓ ડોલ્યાં,

ડાહ્યાઓ ડોલી,

ડગલાઓ ડહોળી,

ડૂબીને ડૂબાડ્યાં.

‘ઠ’ના ઠાકોરજી

 

ઠાકોરજીનો ઠાઠ  ને ઠસ્સો,

ઠેકઠેકાણે ઠરતો ઠસ્સો;

ઠગને ઠોકે ઠેસ-ઠોકરથી,

ઠાંસોઠાંસ ઠીકઠાક ઠસ્સો.

ઠંડીમાં ઠીંગુજી ઠૂઠવે;

ઠારે ઠાકોરજીનો ઠસ્સો;

ઠુમક ઠુમક ઠમરી ઠસ્સો,

ઠારી ઠાલવે ઠુમકે ઠસ્સો;

ઠાકોરજીનો ઠાઠ  ને ઠસ્સો,

ઠેકઠેકાણે ઠરતો ઠસ્સો;