અલ્લડ આ મેઘ….

અલ્લડ આ મેઘને થયું  શું સવારે ? કે સૂરજની બત્તી બુઝાવીને આવે !
છેડ્યો હશે મલ્હાર કોઇ તાના-રીરીએ,કે ચીરીને આભલાને તેથી એ આવે.

પાગલ પવનના અંગ મહીં સૂરો,
ફૂંકી ભરીને લીલા પાનને નચાવે !
શ્વેત આ પ્રભાત પર શ્યામરંગી ચાદર
પાથરીને પ્રેમભીની રમઝટ મચાવે.

અલ્લડ આ મેઘને થયું  શું સવારે ? કે સૂરજની બત્તી બુઝાવીને આવે !
છેડ્યો હશે મલ્હાર કોઇ તાના-રીરીએ, કે ચીરીને આભલાને તેથી એ આવે.

પંખીના કલરવ ને મબલખ આ ધાર,
ગગનની ગરજન ને નવલખ આ ઝાર,
મખમલી ઊર્મિને મનભરી અડકે ને છેડે,
ને ધરાનો કુદરતી રાસ એ રચાવે !

અલ્લડ આ મેઘને થયું  શું સવારે ? કે સૂરજની બત્તી બુઝાવીને આવે !
છેડ્યો હશે મલ્હાર કોઇ તાના-રીરીએ, કે ચીરીને આભલાને તેથી એ આવે.

રોમરોમ જાગે ને વાગે  શરણાઇઓ,
ભીતરના જીવમહીં શિવને જગાડે,
હૈયાના મંદિરમાં મૌનનો ઘૂમ્મટ લઇ,
અનંતના આનંદની ધ્વજા ફરકાવે.

અલ્લડ આ મેઘને થયું  શું આજે ? કે સૂરજની બત્તી બુઝાવીને આવે !
છેડ્યો હશે મલ્હાર કોઇ તાના-રીરીએ, કે ચીરીને આભલાને તેથી એ આવે.

મને હું મળી ગઇ.

મારી જૂની એક રચના “મને હું મળી”  હવે છંદના પોષાકમાં….

નિરવ શાંત સ્થાને મને હું મળી ગઇ.
ન જાણે અજાણ્યે  હવે હું મળી ગઈ…..

ભૂલી તો પડી’તી ઘડી બે ઘડી પણ,
સઘળા એ પંથેથી દૂરે હું મળી ગઇ.

આ શબ્દોની ઝાડી  મહીં વીંટળેલી
ઘનેરા ફૂલોમાં મને હું મળી ગઇ.

ઘડીયાળના ટક ટકારે જીવી’તી,
અહીં અક્ષરોમાં મને હું મળી ગઇ.

કલમની કમાલે ધરી હામ સાચી,
પ્રભુ આ છે પૂજા, શિવે હું મળી ગઇ.

 

મુક્તકોઃ

  • બાંધી મુઠી તો લાખની,
    ખુલ્યાં પછી છે રાખની,
    પૂછો નહી ક્યાં ક્યાં બધી,
    જ્વાળા ફરી છે આગની.
  • સંધ્યા પછીની રાતની,
    અંધાર ઘેરી યાદની,
    ભીંતે ચઢી, છત પર મઢી,
    વાતો મીંચેલી આંખની.

  • ફફડાવી ઉડતી પાંખની,
    પીડા શમે છે જાતની,
    પૂછો નહી,ક્યાંથી મળી,
    તાકાત આ અંદાજની.
      

  • ક્ષણ ક્ષણ મહીં છે આપની,
    કૃપા કહું અહોભાવથી,
    ખુદા પ્રભુ કે હો ઈસુ,
    ખુલે બધી નામાવલિ..

  • રસ્તે ઉતાર ચડાવ છે,
    લાગે હવે મુકામ છે,
    જાણો પછી ઉદાસ થઇ,
    આ તો જરા પડાવ છે.