નવા વર્ષનો સૂરજ

બેસતા વર્ષની શુભ શરુઆત…..સાલ-મુબારક….

ઇશ્વરના રૂપ સમા સૂરજની વાત….

ફરી એક્વાર….આપની સમક્ષ રજૂઆત….

*—————–*—————-*——————*————-*

 

પૂરવનો જાદુગર આવે,

              છાબ કિરણની વેરે;

હળવે હાથે ધીમુ સ્પર્શે,

              પડદા પાંપણના ખોલે.

અંગ મરોડે કાલની વાતે,

              આશ નવી કોઇ લાવે;

મંચ આકાશે નર્તન કરતે,

              રંગ અનોખા વેરે.

કોમળ સવારે,તપ્ત મધ્યાન્હે,

              શીળો બને સમી સાંજે;

સુદૂર સાગરે ડૂબી અન્તે,

              પુનઃ પ્રભાતે પધારે.

જાદુગરનો ખેલ અનેરો,

              ખુબ ખુબીથી ખેલે;

પૂરવ દિશાનો સુરજ ઊગે,

              છાબ કિરણની વેરે..