તડપ

દરિયાને લાગી તરસ !

       એને મીઠા  બિંદુની તલાશ;

આભલાને લાગી ઓછપ,

      એને ધરતીના ટુકડાની આશ.

તારલાને લાગી ઝાંખપ,

       એ તો કોડિયાનો ઝંખે પ્રકાશ;

માનવીના મનને  અજંપ,

       જાણે પંખીની  પાંખની કચાશ.

જાળાં

 jaalaa1.jpg

સૌ પોતાની જાત સાથે જીવે છે,
જાણે કરોળિયાના જાળાં બનાવી જીવે છે.

લોહીના જાળાં તો કદીક લાગણીના,
સ્વયંસર્જિત જાળાં વચ્ચે જીવે છે.

ગૂંચ વધારી, કદીક ઉકેલતા,
ચીસો પાડી, મરતાં મરતાં, જીવે છે.

અપેક્ષાના જાળાં, ને કદી ફરિયાદના,
સંપત્તિના યે જાળાં વચ્ચે જીવે છે.

ભૂતની સ્મૃતિના,ને ભાવિની ચિંતાના,
જાળાં મધ્યે આજ બગાડતાં જીવે છે.

અરે,પ્રેમની પ્યાસમાં વેર વધારતાં !!
આજમાં રહીને કોણ આજે જીવે છે ?

સૌ પોતાની જાત સાથે જીવે છે,
જાણે કરોળિયાના જાળાં બનાવી જીવે છે.

સ્મૃતિ

અતીતના આગળે અડક્યાં જ્યાં આંગળા,

         પગરવ તમારા સંભળાયા;

સ્મૃતિનાં દ્વાર જરા ખોલ્યાં ન ખોલ્યાં,

         પડછાયા તમારા પરખાયા;

શૈશવમાં કદમ જ્યાં સંગ સંગ માંડ્યાં,

         એ રસ્તા ફરીથી અફળાયા;

સાથ સાથ ગીતો જે સૂર મહીં ગાયાં,

          એ શબ્દો ફરીથી પડઘાયા;

મિલનના આશ-દીપ મનમહીં પ્રગ્ટ્યા,

        વિદાયના વાયરે બૂઝાયા.

****—————————–****——————————–****—————

જેના જન્મની તારીખ ,એના મૃત્યુની પણ તારીખ બની, એવા એક નિકટના મિત્રની

યાદમાં, તેની બીજી પૂણ્ય તારીખે,ઉપરોક્ત સ્મૃતિ…….11/14

નવા વર્ષનો સૂરજ

બેસતા વર્ષની શુભ શરુઆત…..સાલ-મુબારક….

ઇશ્વરના રૂપ સમા સૂરજની વાત….

ફરી એક્વાર….આપની સમક્ષ રજૂઆત….

*—————–*—————-*——————*————-*

 sun1.jpg

પૂરવનો જાદુગર આવે,

              છાબ કિરણની વેરે;

હળવે હાથે ધીમુ સ્પર્શે,

              પડદા પાંપણના ખોલે.

અંગ મરોડે કાલની વાતે,

              આશ નવી કોઇ લાવે;

મંચ આકાશે નર્તન કરતે,

              રંગ અનોખા વેરે.

કોમળ સવારે,તપ્ત મધ્યાન્હે,

              શીળો બને સમી સાંજે;

સુદૂર સાગરે ડૂબી અન્તે,

              પુનઃ પ્રભાતે પધારે.

જાદુગરનો ખેલ અનેરો,

              ખુબ ખુબીથી ખેલે;

પૂરવ દિશાનો સુરજ ઊગે,

              છાબ કિરણની વેરે..

શુભેચ્છા

 diwali.jpg

કુદરતે કરવટ ક્ર્મે લીધી,કાલના પાન ખેરવી આજે,

કૂંપળ નૂતન વર્ષની ફૂટી,આશાનું બીજ ખીલવી આજે,

ઇશ્વર સંગત કરી ગોઠડી,પ્રાર્થના શિર નમાવી  કરું,

તનમનની હો શાંતિ સાચી,શુભેચ્છા અંતરથી આજે….